Над 700 деца беа дел од масовниот училишен крос кој денеска се одржа на спортскиот аеродром Аџи Тепе во Куманово, во организација на Општинскиот сојуз на училишен спорт, а под покровителство на градоначалникот и Советот на Општина Куманово.
На настанот учествуваа ученици од основните и средните училишта од општината, кои се натпреваруваа во машка и женска конкуренција.
Вкупно беа реализирани 14 трки, распределени според возраста на учениците.
Натпреварувачите трчаа на различни дистанци – од 200 метри за најмладите ученици од трето одделение, па сè до 1200 метри за средношколците.
За најуспешните во секоја категорија беа обезбедени награди, при што им беа доделени медали, маици и дипломи како признание за постигнатите резултати.
Организаторите истакнаа дека ваквите настани имаат значајна улога во поттикнување на спортскиот дух и создавање здрави навики кај младите, што е клучно за нивниот правилен раст и развој.
На кросот присуствуваа и претседателката на Советот на Општина Куманово, како и претставници од општинската администрација.
Никола Ивановски