Околу милион домови и деловни објекти во Тексас вчера беа сè уште без струја, четири дена откако ураганот Берил ја зафати американската сојузна држава со силни ветрови и поплави, предизвикувајќи фрустрација кај бизнисите, службениците и жителите кои се соочуваат со екстремни горештини.
Нешто повеќе од половина од корисниците на електроенергетската компанија CenterPoint Energy, односно 2,3 милиони од нив добиле струја до четврток наутро, објави најголемиот снабдувач со електрична енергија во Тексас.
Во Фрипорт, пак, повеќето ресторани останаа затворени по невремето поради прекини на струја. Оштетените далноводи поминаа низ патиштата, а жителите се натрупаа во Мекдоналдс во областа, едно од ретките отворени места, за да ги полнат своите телефони.
Тешкотиите во обновувањето на електричната енергија, исто така, ги забавуваат напорите на некои компании да ги рестартираат своите операции, особено околу Фрипорт, еден од најголемите енергетски центри во Тексас, но повеќето нафтени и гасни компании продолжија со нормална работа.
Производството на нафта и гас продолжува
Фрипорт ЛНГ, третиот по големина производител на течен природен гас (ЛНГ) во САД, вчера почна да повлекува мали количини природен гас за преработка, откако го намали производството во неделата.
„Главната загриженост оваа недела поради влијанието на ураганот Берил врз производството на ЛНГ во САД е намалена“, рече Веи Ксионг, потпретседател на консултантската компанија Ристад, во белешката до клиентите.
Пристаништето Фрипорт соопшти дека ограничувањата за испорака наскоро може да бидат укинати, додека пристаништата во Хјустон, Галвстон и Тексас Сити се отворени.
Заливот на Тексас е дом на огромни капацитети за преработка на нафта и гас, како и фабрики кои произведуваат и извезуваат хемикалии.
Тексас учествува со 40 отсто од производството на нафта во САД и 20 отсто од производството на природен гас во земјата.
Рафинериите, морските производствени локации и пристаништата претрпеа ограничени штети и главно беа вратени во нормална работа до четврток.