Неколку моќни милициски групи во Ирак поддржани од Иран се подготвени да се разоружаат за прв пат за да се избегне заканата од ескалација на конфликт со администрацијата на американскиот претседател Доналд Трамп, изјавија за Ројтерс десет високи ирачки команданти и официјални лица.
Според изворите, кои вклучуваат шест локални команданти на четири главни милиции, потегот за намалување на тензиите следи по повеќекратните приватни предупредувања од американски официјални претставници до ирачката влада откако Трамп ја презеде функцијата во јануари.
Официјални лица, наводно, му рекле на Багдад дека ако не преземе мерки за распуштање на милициите кои дејствуваат на ирачка територија, САД би можеле да ги таргетираат тие групи со воздушни напади.
Изат ал-Шахбандар, висок шиитски политичар близок до владејачката коалиција во Ирак, изјави за Ројтерс дека разговорите меѓу премиерот Мохамед Шија ал Судани и неколку водачи на милициите биле „многу напреднати“ и дека групите се подготвени да ги исполнат барањата на САД за разоружување.
– Фракциите не инсистираат на конфронтација, ниту пак инсистираат да продолжат да дејствуваат во нивната сегашна форма – рече тој, додавајќи дека групите се „целосно свесни“ дека можат да бидат цел на американски напади.