Привремената влада на Мали во неделата објави дека шефот на одделот за човекови права на мировната мисија на ОН има 48 часа да ја напушти земјата бидејќи е прогласен за персона нон грата.
Во соопштението за печатот се наведува дека одлуката за протерување на Гијом Нгеф-Атондоко Андали е поврзана со неговиот наводно пристрасен избор на сведоци на граѓанското општество за брифинзите на Советот за безбедност на ОН за Мали, од кои последниот се одржа на 27 јануари, пренесува Хина.
Мисијата на ОН во Мали, MINUSMA, не одговори веднаш на барањето за коментар. Андали не можеше да се контактира за коментар.
Соработка со Вагнер
Властите на Мали се под притисок поради наводните прекршувања на човековите права и злоупотреби кои наводно ги извршиле вооружените сили во партнерство со руската паравоена група Вагнер во Мали.
На 31 јануари експертите на ОН повикаа на независна истрага за можни воени злосторства и злосторства против човештвото.
Владата на Мали, која ја презеде власта со воен удар во 2021 година, во саботата објави соопштение во кое отфрли некои од наводите на ОН и ја нагласи посветеноста на владата за почитување на човековите права во согласност со меѓународното и националното право.