Францускиот претседател Емануел Макрон свика состанок со неколку министри синоќа за протестите низ целата земја, откако меѓу 256.000 и 450.000 луѓе излегоа на улиците во вторник, според бројките од Министерството за внатрешни работи и синдикатите за образование.
На состанокот во Елисејската палата, како што беше најавено, треба да присуствуваат премиерот Себастијан Лекорни, министерот за внатрешни работи Лоран Нуњез и министерот за национално образование Едуар Жефр, објави BFM.
„Фигаро“ утрово објави дека Нуњез и Жефре ќе бидат сослушани денес пред Националното собрание, во 15 и 18 часот.
Министерството за внатрешни работи процени дека 256.000 луѓе учествувале во протестите низ Франција, од кои 56.000 во Париз, додека синдикатите за образование ја проценуваат бројката на околу 450.000 демонстранти.
Синдикатите им се придружија на средношколците и студентите вчера на националниот ден на протести, кој се одржа во Париз и други поголеми градови, вклучувајќи ги Лион, Лил, Марсеј, Тулуз, Бордо, Рен и Стразбур.
Наставниците и родителите им се придружија на протестите, а некои од нив се обидоа да ги заштитат младите демонстранти од безбедносните сили.
Младите протести со барање за подобри услови во училиштата започнаа минатиот месец и се претворија во едни од најголемите демонстрации во Франција во последните години.
Синдикатот на наставниците во средното училиште USL соопшти дека околу 1.800 средни училишта биле блокирани или затворени низ целата земја од безбедносни причини, додека Министерството за образование соопшти дека наставата била целосно или делумно прекината во 891 средно училиште.
Министерството за внатрешни работи објави дека вчера биле уапсени 488 лица и дека 43 припадници на силите за спроведување на законот биле повредени за време на вчерашните протести, објавува „Фигаро“.
Од почетокот на протестите, вкупно се приведени 5.060 лица, од кои 87 проценти се малолетници, според податоците од Министерството за правда објавени во понеделник вечерта.