Германскиот малопродажен синџир „Лидл“ денес објави дека има намера да инвестира 586 милиони евра во проширување на својата мрежа на продавници во Велика Британија.
„Лидл“ има намера да отвори повеќе од 40 нови продавници во Велика Британија во тековната финансиска година, а раководителот на подружницата истакна дека најавените владини реформи ги отстрануваат пречките за развој и ги поддржуваат нивните амбиции за раст.
Во последната финансиска година, тие отворија 23 продавници.
Трговецот на мало веќе има повеќе од 980 продавници и 14 дистрибутивни центри во Англија, Шкотска и Велс, а сега разгледува стотици потенцијални локации за нови продавници.
„Лидл“ во моментов е најбрзо растечкиот синџир на супермаркети во Велика Британија, покажуваат податоците за секторот.
Во 12-те недели (до 24 март), продажбата на „Лидл“ се зголеми за 9,1 процент, според компанијата за истражување на пазарот „Кантар“.
Германската компанија сега има 7,8 проценти удел на британскиот пазар на прехранбени производи и наскоро би можела да го престигне „Морисонс“, кој моментално е на петто место по пазарен удел, зад „Теско“, „Сејнсбери“, „Асда“ и „Алди“.