Британскиот крал Чарлс Трети денеска испрати велигденска порака во која посочи дека на светот се уште му требаат „вера, надеж и љубов“, нагласувајќи дека „најголемата од нив е љубовта“.
Во својата порака, кралот наведува дека „една од загатките на човековата природа е способноста за голема суровост, но и голема добрина“, додавајќи дека овој парадокс може да се види и во велигденската приказна, како и во секојдневните сцени на „човечкото страдање и херојство низ светот“, пишува Sky News.
„Вечната порака на Велигден е дека Бог толку многу го засака светот што го испрати својот Син да живее меѓу нас, да не научи како да се сакаме еден со друг и да го полагаме својот живот за другите во љубов посилна од смртта“, рекол кралот.
Тој, исто така, го изрази своето „длабоко восхит“ за хуманитарните работници што неодамна ги прими во Бакингемската палата, истакнувајќи ја нивната „отпорност, храброст и сочувство“.
Во согласност со традицијата што ја започна кога беше принц од Велс, кралот Чарлс и оваа година испрати велигденска порака – практика што неговата мајка, кралицата Елизабета Втора, не ја следеше редовно.
Како врховен поглавар на англиската црква, кралот нагласи дека љубовта што ја покажал Исус „ја одразува еврејската етика на грижа за странци“ и дека истата вредност „се рефлектира во исламот, другите религиозни традиции и во срцата на сите кои бараат благосостојба на другите“.
Подоцна денеска, кралот и кралицата ќе присуствуваат на годишната церемонија на Велики четврток во катедралата Дурам, каде што кралот ќе ги додели парите „Maundy“ – специјален паричен подарок на 76 мажи и 76 жени, како признание за нивната христијанска работа во локалните заедници.
Традиционалното делење милостина и миење на нозете на Велики четврток датира од 13 век во Англија.
Минатата година, кралицата Камила присуствуваше на церемонијата во име на кралот, кој тогаш беше спречен поради препораките на лекарите по дијагнозата на рак, пренесува Танјуг.