Кинескиот министер за одбрана Ли Шангфу денеска изјави дека неговата посета на Русија, како негово прво патување во странство по назначувањето на таа позиција, има за цел да му ја покаже на целиот свет цврстата намера на Кина да ја зајакне стратешката соработка со Руската Федерација.
„По назначувањето на функцијата министер за одбрана, првото место за посета е Русија со цел да се покаже на надворешниот свет високиот степен на развој на односите меѓу Кина и Русија и да се покаже цврста решеност за зајакнување на стратешката соработка меѓу вооружените сили на Кина и Русија“, рече Ли Шангфу на средбата со рускиот министер за одбрана Сергеј Шојгу во Москва, пренесува Риа Новости.
Русија и Кина имаат намера да ја продлабочат воено-техничката соработка и да ја подигнат на „ново ниво“, посочи кинескиот министер.
„Вооружените сили на Русија и Кина внимателно ќе ги спроведуваат договорите постигнати од шефовите на држави и ќе ја промовираат воената, воено-техничката соработка и воената трговија меѓу Русија и Кина“, рече Ли.
Тој ја истакна и големата важност што по пристигнувањето во Москва беше примен од претседателот на Русија, Владимир Путин.
Тој му се заблагодари на Шојгу за пречекот и истакна дека првите честитки што ги добил по назначувањето на оваа висока функција биле во име на рускиот министер за одбрана.
Соработката меѓу Русија и Кина има стабилизирачки ефект врз светската ситуација и помага да се смират тензиите, изјави рускиот министер за одбрана Сергеј Шојгу во разговор со својот кинески колега.
Шојгу нагласи дека е важно Русија и Кина заеднички да ја разгледаат тековната трансформација на глобалниот геополитички систем, пренесе ТАСС.
Рускиот министер за одбрана изрази верба во зајакнувањето и проширувањето на воената соработка меѓу Русија и Кина во духот на нераскинливо пријателство.
Ли е во посета на Русија од 16 до 18 април, а во неделата разговараше со претседателот Владимир Путин.
САД воведоа санкции против Ли во 2018 година за купување борбени авиони и опрема од рускиот извозник на оружје Рособоронекспорт.