Кинеската компанија Ганфенг Литиум објави дека потпишала договор со водечкиот турски производител на класични батерии за инвестирање 500 милиони долари во заеднички објект за производство на литиумски батерии за електрични автомобили.
Jiangxi Ganfeng Battery Technology како подружница на Ganfeng Lithium и турскиот производител на батерии Yigit Aku ќе изгради турска производна линија која ќе има годишен капацитет еквивалентен на околу пет гигават-часови енергија, пишува Reuters.
Кинескиот портал CnEVpost, специјализиран за вести за електрични возила, пишува дека е договорена соработка во Турција, но и на глобално ниво и дека кинескиот партнер во заедничкото вложување ќе инвестира 500 милиони долари.
Покрај производствената линија за батерии, проектот вклучува и нивно пакување во Турција.
Јигит Аку, компанија основана во 1976 година во Анкара, има четири производствени погони и два центри за истражување и развој.
Таа е најголемиот производител, извозник и рециклатор на батерии во Турција и соработува со повеќе од 500 партнери во повеќе од 100 земји, рече Ганфенг.
Договореното заедничко вложување вклучува отворање на нови научни и развојни центри со фокус на новите технологии, размена на интелектуална сопственост во областа на напредните технологии за литиумски батерии.
Станува збор, како што се наведува, и за батерии за електрични возила со цврст (ASSB), наместо течен електролит, батерии со голема моќност за тешки возила и батерии за поморски транспорт и аеронаутика.
Ганфенг, пишува порталот, е еден од најголемите кинески производители на различни производи од литиум, кои се користат за електрични автомобили, во фармацевтската индустрија и аеронаутиката.
Ја произведува и првата генерација на хибридни батерии, кои се комбинација од батерии со цврст електролит (ASSB) и традиционални литиум-јонски батерии (LIB). ASSB батериите се сметаат за помоќни и побезбедни.
Самата Турција, според досегашните истражувања, нема големи резерви на литиум, но Кина има солидни домашни резерви, од кои огромен дел се наоѓаат на Тибетската висорамнина.
Сепак, Кина е главен увозник на литиум, главно од Австралија, Чиле и Аргентина, и е најголемиот преработувач на метал во светот и најголем производител на литиумски батерии.