Канадскиот премиер Марк Карни предупреди дека САД се обидуваат да ја распаднат Канада за да можат да „владеат со неа“, повикувајќи ги жителите на Алберта да гласаат во понеделник за да го отфрлат процесот што би можел да доведе до отцепување на покраината.
Гласањето не е директен референдум за независност, туку одлука за тоа дали на владата на Алберта ќе ѝ биде наредено да покрене законска постапка што ќе доведе до иден референдум за отцепување, објави АП.
Алберта има четврти најголеми докажани резерви на нафта во светот.
„Овој референдум доаѓа во најлош можен момент“, рече Карни на про-канадски митинг во Калгари, предупредувајќи дека светот станал поопасен и поделен и дека одредени актери надвор од границите на Канада работат на распаѓање на земјата за да владеат со неа.
Иако не го спомена директно американскиот претседател Доналд Трамп, изјавите на Карни доаѓаат во време на трговска војна меѓу двете земји и постојаните закани на Трамп да ја претвори Канада во 51-ва американска држава, истакнува АП.
Карни верува дека Канада мора да ја зајакне својата економија и да ја намали зависноста од САД.
Премиерот ги предупреди жителите на Алберта да не го гледаат гласањето само како начин да се испрати порака до федералната влада во Отава.
Карни, кој пораснал во Алберта, за време на кампањата ги истакна врските на покраината со остатокот од Канада, вклучувајќи ги жителите кои се преселиле од други делови на земјата и пожарникарите кои доаѓаат да помогнат за време на пожарите.
Иако Алберта со децении се судира со либералните влади во Отава околу енергетиката и федералните овластувања, Карни се обиде да ја добие поддршката на покраината за промени во енергетската политика.
Тој го забрза процесот на изградба на нов нафтовод до Пацификот и истакна дека проектот „Пацифик врска“ ќе создаде повеќе од 140.000 работни места, ќе ја намали зависноста од САД и ќе обезбеди средства за социјални програми.
Прелиминарното гласање трае до сабота, додека главното гласање е закажано за понеделник, пренесува Танјуг.