32-годишна Канаѓанка е убиена, а неколку лица се повредени откако маж отворил оган на историско место во Мексико, соопштија мексиканските власти.
Клаудија Шајнбаум, претседателката на Мексико, изрази солидарност со жртвите од пукотницата во една од најважните туристички дестинации во земјата – античкиот пирамидален комплекс Теотихуакан.
Инцидентот се случил само седум недели пред првиот натпревар од Светското првенство во Мексико Сити.
„Имаше општа паника бидејќи сите се обидуваа да избегаат во исто време“, изјави британскиот пар за Би-Би-Си, опишувајќи ги хаотичните сцени додека одекнуваше пукотница.
Пирамидите и археолошкото наоѓалиште Теотихуакан се наоѓаат на списокот на светско наследство на УНЕСКО и се меѓу најпосетуваните туристички атракции во земјата.
Полицијата на местото на настанот пронашла огнено оружје, ладно оружје и боева муниција.
Претседателката на Мексико објави дека го следи развојот на ситуацијата и е во контакт со канадската амбасада.
Таа напиша на социјалните мрежи дека му наредила на безбедносниот кабинет да спроведе истрага и да обезбеди секаква потребна помош.
„Она што се случи денес во Теотихуакан длабоко нè потресе. Ја изразувам мојата најискрена солидарност со семејствата на жртвите“, напиша таа на шпански јазик.
Анита Ананд, министерката за надворешни работи на Канада, потврди дека еден граѓанин е убиен, додека друг маж е ранет.
Таа изјави дека канадските конзуларни службеници обезбедуваат помош.
Би-Би-Си контактираше со канадската влада за дополнителни информации.
Државниот секретар за безбедност Кристобал Кастањеда Камариљо изјави дека меѓу повредените има двајца Колумбијци, еден Русин и еден Канаѓанец.
Идентитетот на напаѓачот сè уште не е објавен, а властите не го објавија мотивот за пукањето.
Британски пар од Лондон, кои се на одмор во Мексико и не сакаа да бидат именувани, беа кај Пирамидата на Сонцето кога видоа луѓе како трчаат кон нив викајќи за вооружен човек.
„Пукањето стануваше сè погласно и почесто, а луѓето околу нас беа исто толку вознемирени. Неколку од нив викаа: „Доаѓаат тука“, што предизвика голема паника“, изјавија тие за Би-Би-Си.
Двојката ја убеди туристичката група да се упати кон излезот, и покрај почетната конфузија околу тоа што се случува.
Кога стигнаа до влезот, видоа туристи како сè уште пристигнуваат на местото.
„Немаше организирана евакуација, видовме полицајци како трчаат наоколу, но никој не им кажуваше на луѓето да ја напуштат областа“, рекоа тие.
Додадоа дека не поминале никаква безбедносна проверка кога влегле во местото, иако имале ранец со себе.
„Никогаш не мислите дека ќе се најдете во ваква ситуација, но на крајот сме добро“, рекоа тие.
„Во суштина, имаме среќа, некој го загуби животот денес“, додадоа тие.