Шефот на британската дипломатија Дејвид Камерон денеска изјави дека акциите насочени кон уништување на воените капацитети на Хутите ќе продолжат, откако САД и Велика Британија извршија уште еден бран напади врз јеменските бунтовници.
„Она што го направивме повторно е да испратиме најјасна можна порака дека ќе продолжиме да ја деградираме нивната способност да ги извршуваат овие напади“, рече Камерон, според Ројтерс.
Американските и британските сили бомбардираа повеќе локации во Јемен контролирани од бунтовниците Хути во текот на ноќта, што е втор координиран напад врз воени цели на бунтовниците поддржани од Иран, изјавија неколку американски официјални лица кои сакаа да останат анонимни.
Тие за АП изјавија дека САД и Велика Британија користеле борбени авиони и ракети Томахавк лансирани од воени бродови и подморници за да ги уништат местата и фрлачите на ракети Хути.
Канцеларијата за медиуми на Хутите соопшти дека неколку американски и британски напади биле насочени кон главниот град на Јемен, Сана.
На 11 јануари, САД и Велика Британија започнаа напади врз повеќе од 60 воени цели на Хутите на 28 локации во Јемен.
Тоа беше првиот американски воен одговор на нападите што Хутите почнаа да ги вршат на трговските бродови во Црвеното Море, како поддршка на палестинската милитантна група Хамас во нејзината војна против Израел.