Високата претставничка на Европската Унија за надворешна политика и безбедност, Каја Калас, ќе патува во Оман, каде што треба да се сретне со лидерите на Арапската лига, во време кога во Брисел се проценува дека се отвора простор за посилна улога на ЕУ во преговорите меѓу Иран и Соединетите Американски Држави.
Според „Политико“, состаноците во Швајцарија завршиле со позитивна нота, иако претходно биле во опасност од неуспех.
Медијаторите од Пакистан и Катар објавија дека страните се согласиле да формираат таканаречена ќелија за деескалација, која треба да помогне во смирувањето на ситуацијата во Либан.
Во такви околности, Брисел се стреми да го искористи дипломатскиот простор што се отвори по првите знаци на напредок.
Европската Унија, која не играше водечка улога во активната фаза на кризата, сега проценува дека може да биде важен фактор во технички сложените разговори за нуклеарната програма на Иран.
Во ЕУ веруваат дека на Вашингтон ќе му биде потребна институционална поддршка од Брисел во следната фаза, првенствено поради искуството што Европската служба за надворешни работи го стекна за време на подготовката и спроведувањето на нуклеарниот договор со Иран од 2015 година.
Како дополнителна предност, европските дипломати ја нагласуваат близината на седиштето на Меѓународната агенција за атомска енергија во Виена, што, според Брисел, ја прави Европа природен учесник во секој иден механизам за следење на евентуален нов договор.
Регионалните актери, исто така, очекуваат дека ЕУ би можела да помогне во стабилизирањето на кревкото примирје.
Германија, Франција и Велика Британија веќе распоредија или однапред поставија бродови за отстранување мини во зоната на конфликтот, што во Брисел се претставува како доказ за подготвеноста на Европа да учествува во безбедносниот дел од процесот.
Сепак, дипломатските амбиции на ЕУ се оптоварени од односот со Израел. Израелските власти претходно ги прекинаа врските со Калас по нејзините остри изјави и споредби на израелските политики со Јужна Африка од времето на апартхејдот.
Тој спор би можел да го ограничи просторот за дејствување на Брисел, особено ако разговорите за нуклеарната програма на Либан и Иран се преклопуваат со безбедносните интереси на Израел.
Поради оваа причина, во дипломатските кругови се проценува дека Каласова во Оман ќе се обиде да покаже дека ЕУ не сака само улога на набљудувач, туку место на масата каде што ќе се одлучува за понатамошната архитектура на безбедноста на Блискиот Исток.