На церемонијата „Денот на северните територии“, што се одржува секој 7 февруари во Јапонија, јапонската влада и граѓанските здруженија денеска ја критикуваа Русија за нејзината „незаконска окупација“ на јужните Курили, група острови меѓу јапонскиот Хокаидо и Руската Камчатка која Јапонија ја нарекува „Северни територии“.
„Апсолутно е неприфатливо северните територии да не се вратени ниту 77 години по илегалната советска окупација“, се вели во соопштението што беше усвоено на овогодинешниот „Ден на северните територии“, пренесува Kyodo News.
Јапонскиот премиер Фумио Кишида изјави дека владата останува на ставот „дека ќе бара решение за територијалниот спор со Русија и ќе потпише повоен мировен договор и покрај моменталната лоша состојба на билатералните односи меѓу Русија и Јапонија“.
Изјавите од собирите во 2019 и 2020 година не го користеа терминот „нелегална окупација“, веројатно за да се избегне ескалација на тензиите меѓу Токио и Москва, но јапонската реторика се зацврсти во изминатите две години.
Јапонија тврди дека Советскиот Сојуз незаконски ги окупирал островите Еторофу, Кунашири, Шикотан и групата острови Хабонаи веднаш по капитулацијата на Јапонија во Втората светска војна во 1945 година.
Русија тврди дека окупацијата на овие острови била легитимна. Поради овој територијален спор, Јапонија и Русија никогаш не потпишаа мировен договор со кој формално ќе заврши војната.
Односите меѓу Јапонија и Русија дополнително се влошија по 24 февруари минатата година, кога Русија започна напад врз Украина, а Јапонија се приклучи на западните санкции против Москва.