Јапонското Министерство за одбрана работи на развој на неколку ракети со долг дострел со дострел до околу 3.000 километри и има намера да ги распореди околу 2030 година, објави денеска, сабота, агенцијата Кјодо, повикувајќи се на извор запознаен со ова прашање.
Воен буџет
Владата планира да распореди ракети со дострел од 2.000 километри на почетокот на 2030-тите, и хиперсонична ракета од 3.000 километри што може да достигне насекаде во Северна Кореја и некои делови на Кина околу 2035 година, додава агенцијата.
Во средината на месецот Јапонија најави историска промена во безбедносната политика, удвојувајќи го воениот буџет поради растечките амбиции на Кина и Северна Кореја во регионот.
Ревидираната безбедносна стратегија, објавена во владиниот документ од премиерот Фуми Кишида, е отстапување од пацифистичката безбедносна доктрина по Втората светска војна, наметната на Јапонија од страна на САД.
Безбедносно опкружување
Буџетот за одбрана речиси ќе се удвои во следните пет години, на 2 отсто од БДП, што ќе го направи трет по големина во светот, по САД и Кина.
Јапонија смета дека денешната безбедносна средина е „најсериозна и најкомплицирана“ од Втората светска војна.
И покрај ова, Јапонија рече дека сака да се придржува до политиката „единствено насочена кон самоодбрана“, нагласувајќи дека не сака да стане воена сила.