Најмалку четири лица беа убиени денес во израелски напади во Појасот Газа, вклучувајќи двајца родители со дете, соопштија палестинските здравствени власти.
Во напад врз станбена зграда во Деир ал-Балах во централниот дел на Појасот Газа, Омар Абу Касем, неговата сопруга Асма и нивната шестгодишна ќерка Хабеба беа убиени, додека синот преживеа, но беше повреден, соопштија лекарите, според Ројтерс.
Израелската војска соопшти дека целта биле милитантите на Хамас.
Уште една жртва на израелските воздушни напади е регистрирана во областа на градот Газа, а израелската армија не коментираше за случајот.
Бројот на убиени Палестинци, повеќето од нив цивили, надмина 1.100 од прогласувањето на прекин на огнот меѓу Израел и Хамас во октомври минатата година, според податоците од палестинските здравствени власти.
Исто така, беа убиени и четворица израелски војници.
Хамас обично не открива колку од неговите членови загинале од прогласувањето на прекинот на огнот, кој беше постигнат на иницијатива на Соединетите Американски Држави (САД).
Новиот бран на насилство во Газа доаѓа откако лидерите на Хамас завршија уште една рунда преговори за прекин на огнот во Каиро во вторник, посредувани од Египет, Турција и Катар.
Преговорите се однесуваат на спроведувањето на втората фаза од мировниот план на американскиот претседател Доналд Трамп, што подразбира разоружување на Хамас и повлекување на израелската армија од Појасот Газа.
Извори на Ројтерс блиски до разговорите велат дека е постигнат мал напредок, но недовербата останува длабока меѓу двете страни.
Втората фаза од планот вклучува дозволување на Палестинскиот технократски комитет, поддржан од САД, да ја преземе власта од Хамас, распоредување на меѓународни безбедносни сили и започнување на реконструкцијата на разурнатата од војна Газа.
Индонезија, Мароко, Казахстан, Косово и Албанија ветија дека ќе обезбедат војници за меѓународните сили за стабилизација, поддржани од САД, но преговорите меѓу Мировниот комитет на Трамп и Хамас се во застој со месеци.