Руски воен брод извршил воена вежба со боево гаѓање на само 40 наутички милји (околу 74 километри) од британскиот брег, во непосредна близина на Плимут.
Како што потврди британското Министерство за одбрана, бродот „Неустрашиви“ ги придружувал нафтените танкери од таканаречената руска „флота во сенка“ низ Ла Манш, објавува Скај њуз.
Британците внимателно ги следеле маневрите
Инцидентот се случил во меѓународни води, а вежбата со артилериско гаѓање траела околу 30 минути.
Пред самиот почеток на вежбата, рускиот екипаж го информирал британскиот воен брод ХМС Тајн за намерата да го изврши маневрот и побарал од британскиот брод да се премести на побезбедно растојание, што и било сторено.
„Руски воен брод, придружуван од Кралската морнарица, изврши вежба со боево гаѓање во меѓународни води јужно од Плимут. Нашите сили ја следеа вежбата во текот на целото време и остануваат подготвени да ја заштитат националната безбедност на Обединетото Кралство“, соопшти британското Министерство за одбрана.
Серија инциденти и запленувања во Ламанш
Ова е втор случај во последните недели руски воени бродови да ги следат санкционираните танкери низ Ламанш. Тензиите во овој дел од Европа траат со месеци.
Минатиот месец, рускиот брод „Адмирал Григорович“ испука предупредувачки истрели кон британски пар на едрилица.
Британските командоси и полицајци неодамна се спуштија од хеликоптер на еден од руските танкери во сенка и го запленија 25 милји јужно од островот Вајт.
Француската морнарица, со помош на Британците, постојано пресретнуваше и запленуваше танкери за нафта под меѓународни санкции во Медитеранот и Ламанш.
Суровиот пристап и одобрувањето на запленувањето на бродови што превезуваат руска нафта доведе до тоа многу бродови од оваа флота да ги променат рутите за да избегнат минување низ Ламанш.