Командантот на снајперските сили на Хамас во баталјонот Тел Султан во Рафа на југот на Газа, Ахмад Ијад Мухамед Фархат, е убиен во неодамнешниот напад на израелските одбранбени сили (ИДФ), соопшти израелската армија.
Според ИДФ, снајперскиот командант Фархат бил одговорен за унапредување и извршување на бројни напади врз израелските војници во Газа и во Израел, објави „Тајмс оф Израел“.
Армијата вели дека во текот на изминатиот ден војници убиле неколку оперативци и уништиле згради каде што имало мини, а 36-та дивизија напредувала во таканаречениот коридор Мораг.
Во северниот дел на Газа, 252-та дивизија лоцираше и уништи дополнителна инфраструктура на Хамас, а група вооружени оперативци беа гранатирани и убиени во нападот, соопшти ИДФ.
Во текот на изминатиот ден борбени авиони, беспилотни летала и хеликоптери на израелските воздухопловни сили погодија околу 40 цели во Газа, пренесува Танјуг.
ИДФ соопшти дека целите вклучувале ќелии на оперативци, згради што ги користат терористичките групи, оружје и друга инфраструктура.