Израелската влада дебатира за замрзнување на нејзината контроверзна планирана судска реформа, откако масовните протести избија во неделата навечер, објави „Џерусалим пост“ во понеделникот наутро.
Десетици илјади луѓе спонтано се собраа во Тел Авив за да протестираат поради тоа што израелскиот премиер Бенјамин Нетанјаху го разреши министерот за одбрана Јоав Галант откако тој ја повика владата да ја прекине реформата, чии клучни елементи се очекува да бидат усвоени во следните неколку дена.
Во Ерусалим, гневните демонстранти наводно ја пробиле блокадата во близина на резиденцијата на Нетанјаху, иако не е јасно дали 73-годишниот премиер бил дома.
Со оглед на ситуацијата, Нетанјаху свика итен состанок.
Според „Џерусалим пост“, разговорите што започнаа во неделата вечерта продолжија до раните утрински часови во понеделникот.
Лидерите на екстремно десничарската коалициска влада на Израел треба да се сретнат во понеделник во кабинетот на премиерот, објави порталот ynet news.
Извор на Ликуд изјави за Ројтерс дека Нетанјаху најверојатно ќе ја запре реформата.
Израелскиот претседател Исак Херцог ја повика владата да ги запре контроверзните планирани судски реформи откако земјата беше потресена од насилни протести во неделата вечерта.
„Во име на единството на израелскиот народ, во име на одговорноста, ве молам веднаш да го запрете законодавниот процес“, напиша Херцог на Твитер во понеделникот рано наутро, во апел до екстремно десничарската коалициска влада на премиерот Бенјамин Нетанјаху.
„Луѓето се зафатени од длабок страв“, рече Херцог, додавајќи дека безбедноста, економијата и општеството на Израел се загрозени.
САД изразија длабока загриженост и повикаа на итен компромис по избувнувањето на протестите во Тел Авив.