Грчката претседателка Катерина Сакеларопулу изјави дека Атина има „водечка улога“ во рамките на Европската унија во поддршката на земјите од Западен Балкан на нивниот пат кон членство во ЕУ.
„Како деветта најстара членка на денешната Унија, Грција игра водечка улога во поддршката на пристапните преговори со Западен Балкан, како и во подобрувањето на политичките и економските односи на сите земји во Југоисточна Европа и во Источниот Медитеран“, рече таа на состанокот за отворање на економскиот форум во Делфи.
Економскиот форум Делфи, кој е источноевропска верзија на Светскиот економски форум во Давос, се одржува оваа недела во грчки град на 160 километри од Атина, пренесува Хина.
Меѓу темите ќе бидат руската агресија врз Украина, политичката ситуација во Југоисточна Европа, со акцент на Босна и Херцеговина и дијалогот меѓу Косово и Србија.
За време на грчкото претседавање со ЕУ во 2003 година, беше усвоена Декларацијата од Солун, во која за првпат беше наведено дека иднината на Југоисточна Европа е во рамките на ЕУ.
„Енергетската зависност не обезбедува мир“
Оттогаш поминаа 20 години, но само Хрватска влезе во ЕУ во 2013 година.
Грчката претседателка смета дека руската инвазија на Украина треба да ги забрза пристапните преговори со Србија, Босна и Херцеговина, Црна Гора, Северна Македонија и Албанија.
„Унијата геополитички созреа поради руската инвазија. Таа сфати дека економската и енергетската зависност од авторитарни режими не обезбедува мир“, рече Сакеларопулу.
Грција ја поддржува Украина, која Русија ја нападна пред 14 месеци.
„Грција, како органски дел од Европа и Западот, од првиот момент побрза да ги брани вредностите на меѓународното право од агресивниот ревизионизам. Поддршката на украинскиот народ, чија иднина во демократска Европа е мир и просперитет, останува обврска на Западот“, рече грчкиот претседател.
Осврнувајќи се на подобрувањето на односите меѓу Грција и Турција по разорните земјотреси во февруари и помошта испратена од Грција, таа посочи дека тоа „ги зближува двата соседни народи и создава надеж за нова, подобра ера во билатералните односи“.