Дефектолошки кабинет, наменет за дополнителна образовна поддршка на децата, беше промовиран денеска во објектот „Пчелка“ на ЈОУ Детска градинка „Ангел Шајче“ во Куманово, при посетата на градоначалникот Максим Димитриевски и министерот за социјална политика, демографија и млади, Ѓоко Велковски.
Кабинетот е специјално опремена просторија наменета за стручните соработници и наставниот кадар, а е реализиран со сопствени средства на градинката. На настанот присуствуваа и претседателката на Советот на Општина Куманово и пратеници во Собранието.
Ваков кабинет за инклузија на децата веќе функционира и во објектот „Синоличка“, со што се прошируваат можностите за стручна поддршка во рамките на предучилишното воспитание и образование.
За време на посетата, министерот Велковски информираше и за можноста за изградба на нова градинка во населбата Зелен Рид, посочувајќи дека документацијата за проектот сега е комплетирана и дека е отворен повик за поддршка на капитални инвестиции.
– Отворен е повикот во Министерството за програмата за поддршка на капиталните инвестиции, така што градоначалникот сега ќе аплицира заедно со Советот на Општина Куманово, а понатаму постапката ќе ја преземе Министерството за социјална политика, демографија и млади“, изјави Велковски.
Дефектолошкиот кабинет е реализиран со сопствени средства на градинката.
На настанот беше организирана и кратка музичка приредба, на која децата од градинката се претставија со есенска кореографија.
Никола Ивановски