Фудбалерите на Футсал клубот Форца од Куманово викендов го кренаа пехарот во Македонската футсал лига и за прв пат станаа шампиони.
Откако клубот лани дебитираше во македонската футсал лига, годинава стигна до трофеј.
Дури осумина играчи од ФК Форца се дел од футсал репрезентацијата на Македонија и интересно е што тимот има мешан состав и играат заедно Македонци и Албанци.
Градоначалникот на Општина Куманово, Максим Димитриевски им упати честитки.
– Уште еден клуб како вистински репрезент на градот се запиша во спортската историја на Куманово како прв државен првак во овој спорт. Футсал клубот „Форца” е вистински пример за соживот, вистински пример за Куманово и Македонија во мало. Вистински пример дека државата ќе ја придвижиме напред, само ако квалитетот е пред сите останати вредности, рече Димитриевски.
Инаку, клубот натпреварите сезонава ги играше во спортската сала „Фаик Коница“ во Слупчане, но по реконструкцијата на спортската сала Куманово се очекува тимот да игра тука.
Никола Ивановски