Европските мориња достигнаа извонредно високи температури ова лето, а климатските промени се главно одговорни за затоплувањето, заклучи меѓународен тим истражувачи во извештај, објави денес германската агенција dpa.
Температурите на површината на морето по речиси сите европски брегови се повисоки од просекот забележан помеѓу 1990 и 2020 година, а западниот Медитеран, Бискајскиот Залив и Иберискиот Полуостров се меѓу најтешко погодените области.
Во некои области, температурите се повеќе од шест степени целзиусови над нормалните нивоа.
Тим од научната мрежа World Weather Attribution (WWA), која го анализира влијанието на климатските промени врз екстремните временски настани, ги спореди температурите на површината на морето во јуни со климатските модели за да ги процени ефектите од глобалното затоплување.
Тие заклучија дека климатските промени ја зголемија просечната температура за приближно два степени Целзиусови во Средоземното Море, 1,4 степени во Бискајскиот Залив и западниот брег на Иберискиот Полуостров и 1,3 степени околу Ирска и западниот брег на Велика Британија.
Нови видови во необични области, бури…
Оваа година, топлотните бранови погодија 90 проценти од бреговите околу Бискајскиот Залив и Иберискиот Полуостров, како и 80 проценти од западниот Медитеран.
Без затоплувањето предизвикано од човекот, кое моментално е 1,4 степени над прединдустриските нивоа, истражувачите проценуваат дека тие бројки би изнесувале околу 40 проценти во двата региона.
Потоплите мориња можат да ги нарушат морските екосистеми и синџирите на исхрана и потенцијално да ги намалат популациите на морските цицачи и птици.
Рибарите во југозападна Англија, исто така, забележале нагло зголемување на бројот на октоподи од 2025 година.
Тоа е вид кој нормално се наоѓа во потоплите води околу Северна Африка. Повисоките температури на морето, исто така, можат да предизвикаат бури, велат истражувачите, наведувајќи ја како пример смртоносната поплава во шпанската покраина Валенсија во 2024 година.