Европската агенција за безбедност на храната (EFSA) и здравствените власти денес објавија дека епидемија на инфекција со салмонела поврзана со ароматизирани инстант нудли е регистрирана во неколку европски земји, со 106 потврдени случаи, претежно кај деца и млади луѓе.
Случаите за прв пат беа пријавени во ноември, а најмалку 49 лица се хоспитализирани, соопштија EFSA и Европскиот центар за превенција и контрола на болести (ECDC) во одделни изјави.
Агенциите соопштија дека „производите со ароматизирани нудли се најверојатен извор на епидемии во повеќе земји“, со докази што ги поврзуваат случаите со производи од истата марка.
Иако не е идентификуван специфичен дистрибутер, се вели дека случаите на инфекција со сојот Salmonella Stanley се поврзани со производител во Украина.
Компанијата Reva Foods објави дека во една серија од нејзините инстант тестенини наменети за балтичкиот пазар, произведена од украинскиот производител Juro Food Service, е забележано „наводно откривање“ на Salmonella Stanley.
Компанијата соопшти дека започнала внатрешна истрага и ги повлекла спорните серии на производи, како и дека преземала дополнителни мерки, вклучувајќи лабораториски тестови, регулаторни проверки и зголемен надзор.
„Безбедноста на нашите потрошувачи е наш приоритет“, објави компанијата, додавајќи дека соработува со надлежните институции.
Европските власти соопштија дека случаи се пријавени во Австрија, Велика Британија, Чешка, Данска, Естонија, Франција, Германија, Унгарија, Латвија, Литванија, Холандија, Норвешка, Полска и Шведска.
Според микробиолошките анализи, сојот на епидемијата е откриен во Германија и Литванија во пилешко и производи со тестенини со вкус на зачинето пилешко.
Според агенцијата, истрагата е во тек.
Симптомите на инфекција со салмонела вклучуваат дијареја, треска, повраќање, дехидратација и грчеви во стомакот.
Повеќето пациенти се опоравуваат во рок од една недела, но инфекцијата може да биде потешка кај малите деца, постарите лица и лицата со ослабен имунитет, пренесува Танјуг.