Експертите очекуваат глобалната инфлација да остане висока до 2028 година, покажува истражувањето на економските експерти (ЕЕС) за четвртиот квартал од 2024 година, објавено денеска од Институтот Ифо со седиште во Минхен и Швајцарскиот институт за економска политика.
Краткорочните очекувања за инфлација стагнираат на високо ниво, па експертите очекуваат просечната инфлација во 2025 година да биде 3,9 отсто, исто како и во претходниот квартал.
Според експертите, глобалната инфлација ќе падне на 3,5 отсто во 2025 година и ќе остане на ова ниво до 2028 година.
Инфлациските очекувања се многу различни во различни региони во светот.
За 2025 година експертите очекуваат најниска просечна стапка на инфлација во Западна Европа од 2,1 отсто.
Очекувањата за Северна Америка, Океанија и Северна Европа се малку повисоки и се движат меѓу 2,6 и 2,7 проценти.
За јужноевропскиот регион се прогнозира просечна стапка на инфлација од 3,5 отсто оваа година, а за источноевропскиот регион од 7,5 отсто, што е над целите на централните банки на земјите во овие области.
Во Азија, постои значителна хетерогеност меѓу подрегиони, додека целиот африкански континент освен Јужна Африка се очекува да доживее натпросечна инфлација.
Стапките на инфлација во Западна Европа ќе се вратат на два проценти во 2028 година, во Северна Европа на 2,5 проценти, а во Океанија 2,5 проценти, што е блиску до стапката на инфлација од два проценти што ја целат многу централни банки, се додава во извештајот.
Истражувањето било спроведено од 4 до 18 декември и во него учествувале 1.398 економски експерти од 125 земји, објавено е на веб-страницата на ИФО, пренесува Танјуг.