Речиси 12 евра – толку треба да чини кутија цигари за неколку години. Според еден извештај, германската влада има намера да го зголеми данокот на тутун повеќе од планираното.
Црно-црвената коалиција, според сите извештаи, има намера да го зголеми данокот на тутун повеќе отколку што беше планирано досега.
Ова произлегува од таканаречениот предлог за формулација на германското Министерство за финансии наменет за парламентарните групи на владејачката коалиција, во кој Уредничката мрежа на Германија имаше увид.
Тој треба да придонесе за заштита на јавното здравје – но и за зголемување на даночните приходи.
Речиси 12 евра по кутија
Според тој документ, цената на кутија од 20 цигари треба постепено да се зголемува на речиси 12 евра до 2030 година.
Тоа би било околу 40 центи повеќе од она што досега се предвидуваше.
Според нацрт-законот на германската влада, даноците на ситно сечкан тутун – односно тутун за виткање цигари – како и на тутун за лулиња, пури и цигарилоси ќе се зголемуваат секоја година.
Истото треба да важи и за заменските производи, како што се, на пример, течностите за електронски цигари – во тој случај, според извештаите, уделот на данокот ќе се зголемува секоја година за еден цент на милилитар.
И новинската агенција ДПА објави за зголемувањето на очекуваните даночни стапки, повикувајќи се на извори од владејачката коалиција.
За јавното здравје – и даночната каса
Причината за оваа промена е, според извештаите, дефицитот во федералниот буџет.
Извори од владата изјавија, според извештајот на Уредничката мрежа на Германија, дека „умереното зголемување“ не служи само за консолидирање на буџетот:
„Зголемувањето служи и за заштита на јавното здравје и е во согласност со целта на Федералната влада да го намали процентот на пушачи меѓу младите и возрасните“.
Поточно, повисоките даночни стапки треба, според тие изјави, да донесат дополнителни даночни приходи проценети на 756 милиони евра во 2027 година.
Заедно со постепените зголемувања, тие приходи ќе продолжат да растат во наредните години – до над три и пол милијарди евра во 2030 година.