Велика Британија станува сè позатворена економија поради Брегзит, а штетните долгорочни импликации за продуктивноста и платите ќе го чинат просечниот работник 470 фунти (577 долари) секоја година до крајот на деценијата, според студијата објавена денес.
Автори на студијата се вонреден професор на Лондонската школа за економија Свати Дингра, која ќе се приклучи на Комитетот за монетарна политика на Банката на Англија во август, и истражувачи од тинк-тенк центарот на Фондацијата Резолуција.
Пандемијата „Ковид-19“ што избувна во јануари 2020 година, веднаш по излегувањето на Велика Британија од Европската унија, ја искомплицираше анализата на економските влијанија на самиот Брегзит, пренесува „Ројтерс“.
Новите трговски правила по Брегзит, кои стапија на сила во јануари 2021 година, не доведоа до постојан пад на британската трговија со ЕУ во споредба со остатокот од светот, спротивно на претходните очекувања на многу аналитичари, се вели во студијата.
„Наместо тоа, Брегзит имаше повеќе дифузно влијание со намалување на конкурентноста и отвореноста на Британија за трговија со поширок опсег на земји. Ова на крајот ќе резултира со намалување на продуктивноста, како и на реалните плати“, вели Софи Хејл, економист од Фондацијата Резолушн.
Како одговор на извештајот, британската влада рече дека работи на ново законодавство за да го поттикне економскиот раст и дека трговијата со ЕУ сега е над нивото пред пандемијата.
Британија не е изложена на царини за извоз на стоки во ЕУ, но има и други повисоки регулаторни бариери.
Во извештајот се наведува дека нето ефектот од овие бариери ќе ја намали продуктивноста во целата економија за 1,3 отсто до 2030 година со непроменето ниво на трговските односи, што значи дека годишните плати ќе паднат за 1,8 отсто или 470 фунти по работник.