Банкнотите со ликот на кралот Чарлс влегоа во оптек во Велика Британија во средата, речиси две години откако тој ја наследи покојната кралица Елизабета како монарх.
Сликата на кралот Чарлс ќе се појави на новите банкноти на Банката на Англија од 5, 10, 20 и 50 фунти.
Постојните банкноти со ликот на Елизабета ќе продолжат да се користат.
Ова е во согласност со препораките „со цел да се минимизираат финансиските ефекти од оваа промена и последиците по животната средина. Тоа значи дека јавноста многу постепено ќе почне да гледа банкноти (со ликот на) кралот Чарлс III“, велат од Банката на Англија.
Елизабета беше првиот монарх што се појави на британските банкноти, додека монетите во Англија прикажуваа слики на кралеви и кралици повеќе од 1.000 години.
Дизајнот на новите банкноти беше откриен во декември 2022 година, набргу откако монетите со ликот на Чарлс стапија во употреба.
Освен новиот крал, дизајнот на банкнотите не се промени.
Употребата на готовина драстично опадна во Британија во изминатите неколку години бидејќи потрошувачите се повеќе преферираат дебитни картички и други форми на електронско плаќање.
Според Британскиот малопродажен конзорциум (BRC), готовината сочинувала повеќе од половина од трансакциите во продавниците во 2014 година, но нејзината употреба е намалена на 15 проценти во 2021 година, делумно поради мерките за борба против Ковид-19 и ќе се зголеми на 19 проценти во 2022 година.
„Ние сме посветени на обезбедување банкноти се додека јавноста ги бара. Објавувањето на овие нови банкноти е знак на таа посветеност“, рече гувернерот на Банката на Англија, Ендрју Бејли во средата.