Австралиската компанија Resolute Mining соопшти дека ќе плати 160 милиони долари на владејачката хунта во Мали за да го реши даночниот спор, повеќе од една недела откако извршниот директор на компанијата и двајца вработени беа приведени во оваа западноафриканска земја.
Теренс Холохан, извршен директор на компанијата за ископување злато и уште двајца вработени беа приведени на 8 ноември во Бамако, главниот град на Мали.
Тие беа во посета за да разговараат за неодреден спор.
Не е соопштено зошто се приведени, јавува Асошиејтед прес.
Армијата ја презеде власта пред четири години
Претседателот на компанијата Ендрју Вреј најави дека компанијата ќе му исплати на Мали 80 милиони долари од „постојните готовински резерви“, со дополнителна исплата од 80 милиони долари во „наредните месеци“.
Од компанијата изјавија дека извршниот директор на компанијата и двајцата вработени се „безбедни“ и дека соработуваат со властите на Мали за да ги ослободат.
Австралиската компанија со години работи во рудникот за злато Сјама во Мали.
Таа држи 80% од рудникот, додека владата на Мали ги држи останатите 20%.
Апсењата ја претставуваат најновата контроверзност во клучниот рударски сектор во Мали, во кој доминираат странци.
Во септември беа приведени четворица вработени во канадската компанија Барик Голд.
Мали е еден од водечките производители на злато во Африка, но со години се бори со џихадистичко насилство и високо ниво на сиромаштија и глад.
Војската ја презеде власта во 2020 година и оттогаш хунтата ги става странските рударски компании под зголемен притисок додека се обидува да ги зголеми владините приходи.