Најактивниот вулкан на Филипините денеска стана активен, исфрлајќи мали количини лава по падините на вулканот Мајон, а десетици илјади луѓе се во подготвеност да ја напуштат опасната зона во случај на голема ерупција.
Откако вулканската активност се интензивираше минатата недела, повеќе од 12.600 луѓе избегаа од претежно сиромашните земјоделски заедници на 6 километри од кратерот на Мајон, пренесува АП.
Сепак, илјадници луѓе остануваат во опасната зона во подножјето на Мајон бидејќи немаат каде да одат и да се извлечат од потенцијалната поголема опасност.
Бидејќи вулканот почна да исфрла помали количини лава во неделата навечер, зоната со висок ризик околу Мајон може да се прошири доколку ерупцијата стане поинтензивна и поопасна, изјави Терезито Баколкол, директор на Филипинскиот институт за вулканологија и сеизмологија.
Баколкол предупреди дека доколку тоа се случи, луѓето во која било проширена опасна зона треба да бидат подготвени да се евакуираат во засолништата за итни случаи.
„Она што го гледаме сега е непредвидлива вулканска активност и ја следиме од ден на ден“, изјави Баколкол за Асошиетед прес.
Во четвртокот официјално беше прогласена тревога за вулкан на третото од петте нивоа бидејќи вулканот е активен и непредвидлив и постои ризик од голема ерупција во наредните денови.