Јужноафриканскиот претседател Сирил Рамафоса денеска пристигна во Украина во рамките на африканската мировна мисија.
Се очекува Рамафоса денеска да се сретне со украинскиот претседател Володимир Зеленски, а потоа да отпатува за Русија на разговори со Путин во сабота.
За време на посетата на африканската мировна делегација, во Киев одекнаа експлозии и затоа африканските лидери се засолниле во хотелско засолниште, пренесе Ројтерс.
„Путин покажа дека не размислува за безбедноста на странските лидери“
Андриј Јермак, советник на украинскиот претседател, исто така ги коментираше експлозиите во Киев.
„Рускиот ракетен напад се случи токму кога лидерите на африканските земји пристигнаа во главниот град. Путин покажува дека не размислува за безбедноста на странските лидери. Всушност, тој не се грижи затоа што мисли дека е недопирлив“.
„Ракетите гаѓаа дури и кога американскиот претседател Џо Бајден и генералниот секретар на ОН Антонио Гутереш пристигнаа во Украина. Светот мора да разбере дека сега е неопходна консолидација и најстрог можен однос кон Русија. Неопходно е да се покаже сила на државата што ја поткопува глобалната безбедност и користи терористички тактики.методи“, додал Јермак, а пренесува „Гардијан“.
Повлекување на руските војници, откажување на налогот за апсење на Путин…
Според нацрт-документот што го видел Ројтерс, африканската мировна мисија најверојатно ќе предложи серија „мерки за градење доверба“.
Во документот се наведува дека целта на мисијата е „да ја промовира важноста на мирот и да ги охрабри страните да се согласат со процесот на дипломатски преговори“.
Тие мерки би можеле да вклучуваат повлекување на руските војници, отстранување на тактичкото нуклеарно оружје од Белорусија, суспендирање на налогот за апсење на Путин на Меѓународниот кривичен суд и олеснување на санкциите.