Агенцијата за разузнавање преку соопштение објавено на официјалната веб страна на агенцијата МИА, излезе со свој став пред јавноста по кумановските настани и објавувањето на идентитетот на разузнавачот на некои домашни и странски медиуми кој вработен според објавите, наводно соработувал со организаторите на вооружената група во Куманово.
Соопштението го пренесуваме интегрално:
„Јавното посочување на идентитетот и фотографии на вработени во Агенцијата за разузнавање претставува загрозување на нивната лична безбедност, безбедноста на семејствата на вработените и загрозување и поткопување на законски утврдените надлежности и методи на работа на Агенцијата за разузнавање на Република Македонија. Со овие активности се нанесени штетни последици за службата што претставуваше и основа Агенцијата да поведе постапка за кривична одговорност пред надлежниот Јавен обвинител согласно Кривичниот Законик на Република Македонија.
Поведената постапка има за цел да се утврди одговорност за објавениот идентитет и фотографија на вработен во Агенцијата за разузнавање на Република Македонија, потеклото на фотографијата и лицето кое имало пристап до неа, како и начинот на кој истата станала достапна до медиумите каде што беше објавена.
Целосно е неприфатливо вработени во Агенцијата за разузнавање да бидат јавно изложени во медиумите во Република Македонија врз основа на шпекулации, гласини и претпоставки објавени во странски медиуми, кои се повикуваат на извори од странски разузнавачки служби како преземени вести и информации.
Во вакви и слични случаи, во иднина Агенцијата за разузнавање нема да дава понатамошни коментари и истите ќе бидат соодветно процесуирани во ЈОРМ на РМ.
За конкретните случаи во Гошинце и во Куманово, во однос на намерите на водачите на терористичката структура, нивните капацитети, логистички бази, курс на акција на непријателот од страна на Агенцијата, направено е рано предупредување во рамки на своите надлежности, согласно Законот за Агениција за разузнавање.
Агенцијата ги почитува слободата на изразување и слободата на медиумите како највисока демократска придобивка, но секогаш ќе реагира пред надлежните институции и новинари на медиуми, своите сознанија за активности за загрозување на безбедносната состојба и намери за вршење кривични дела против државата, да ги достават до надлежните институции за нивно спроведување во истражна постапка, се вели во соопштението за медиуми издадено до Агенцијата за разузнавање.