Отсекот за превенција при СВР Куманово спроведе превентивна кампања по повод почетокот на зимската сезона, која започнува на 15 ноември и ќе трае до 15 март следната година.
Со почетокот на зимската сезона стапува во сила и законската обврска за задолжително поседување зимска опрема во возилата што учествуваат во сообраќајот.

Надлежните потсетуваат дека возачите треба да користат соодветни зимски пневматици и синџири за снег, доколку тоа го бараат условите на патот.
Во рамки на кампањата, возачите се советуваат редовно да го проверуваат нивото на антифриз, притисокот во пневматиците, моторното масло и акумулаторот, како и секогаш да имаат доволно течност за чистење на ветробранското стакло.

Началничката на Отсекот за превенција, м-р Лиле Младеновска, упати апел до сите граѓани, возачи и останати учесници во сообраќајот, без разлика дали се движат низ градските улици или на меѓународните линии, доследно да ја почитуваат законската обврска.

Таа посочи дека е особено важно брзината на движење секогаш да се приспособува на условите на патот, особено при голомразица, намалена видливост, магла, како и врнежи од снег и дожд.

Целта на кампањата е подигнување на свеста кај возачите за важноста од навремена подготовка на возилата за зимските услови и придонес кон побезбеден сообраќај, со што ќе се спречат сообраќајни незгоди и загуба на човечки животи.






Никола Ивановски

