Голема музичка вечер го очекува Куманово! Градскиот плоштад вечерва, ќе биде центарот на забавата по повод одбележувањето на 11 Ноември – Денот на градот, со мега концерт на кој ќе настапат познати македонски музички имиња, како и локални изведувачи.
Концертната програма започнува во 19:30 часот, а публиката ќе има можност да ужива во настапите на Next Time, Young Dadi, Bardhi, Brass Brothers, Анастасија Спасевска, Марио Арангеловски, Чапај, Ивона Јо, Мартинијан Кириловски, Лука Чомбе, Драгана Јовановска и Филип Александровски.
Музичката вечер ќе биде поделена во неколку програмски блока, а отворањето е резервирано за домашните музички изведувачи предводени од групата Солушн, со што ќе им се даде простор и на локалните таленти да бидат дел од празничната прослава.
Потоа следуваат настапите на Young Dadi и Bardhi, кои се очекува да ја раздвижат помладата публика, додека третиот дел од програмата ќе го одбележат Brass Brothers од Битола, познати по своите изведби на домашни и светски музички хитови со дувачки инструменти.
За големото финале се резервирани Next Time, кои ќе бидат главните музички ѕвезди на вечерта.
Концертот е во организација на Фондацијата за култура и спорт, под покровителство на градоначалникот и Советот на Општина Куманово.
Граѓаните се поканети вечерва да излезат на градскиот плоштад и заеднички, со музика и добра атмосфера, да го одбележат празникот на својот град.
Никола Ивановски