По должината на источната граница на Латвија со Русија, во тек е изградбата на „Балтичката одбранбена линија“, во чии рамки се копаат противтенковски ровови, со цел да се спречи движењето на воени возила на потенцијален непријател, објави денес латвискиот јавен сервис LSM.
Досега се ископани четири километри противтенковски ровови, а планирано е да се ископаат вкупно 89 километри ровови, од кои 27 километри треба да бидат завршени до следната пролет.
На границата се поставуваат масивни триаголни бетонски бариери, таканаречени „змејски заби“, во три реда, од кои секоја тежи тон и пол, е висока малку повеќе од еден метар, а подоцна до нив ќе се ископа противтенковски ров.
Во граничната зона на регионот Балва, каде што војниците на Националната гарда го завршуваат своето распоредување, веќе се ископани противтенковски ровови широки над пет метри, во кои подоцна ќе бидат поставени „змејските заби“.
Се наведува дека бариерите нема да бидат поставени по целата должина на границата на Латвија со Русија и Белорусија, која е подолга од 450 километри, бидејќи на некои места мочуриштата, езерата и густите шуми служат како природни пречки.
Наредникот Едгарс Бриедис од инженерската чета на Втората бригада Видземе на Латвиската национална гарда изјави дека „овие пречки се наоѓаат на такво растојание една од друга што непријателската опрема нема да може да ги надмине“.
Латвија издвои 303 милиони евра за воено воспоставување на границата со Русија до 2029 година, а овие средства се наменети не само за копање ровови и поставување „змејски заби“, туку и за развој на други одбранбени системи.