Маж вооружен со три огнени оружја е уапсен во близина на Белата куќа откако наводно им кажал на членовите на американската тајна служба дека дошол во Вашингтон за да го убие американскиот претседател Доналд Трамп, објави денес Министерството за внатрешна безбедност на САД.
Како што објави CBS, осомничениот, идентификуван како Рони Џордрикс Гуанипа Кринос, венецуелски државјанин, бил уапсен во четврток вечерта на авенијата Конституција откако членовите на Тајната служба го забележале неговото сомнително однесување во паркирано возило.
Според министерството, кога му се приближиле, осомничениот рекол дека слушнал гласови кои му кажуваат да дојде во Вашингтон и да го убие Трамп.
Полицијата утврдила дека возилото е пријавено како украдено и пронашла три огнени оружја, вклучувајќи пушка, и десетици куршуми во него.
Тој се соочува со повеќе обвиненија, вклучувајќи нелегално транспортирање огнено оружје, носење нерегистрирано оружје и муниција, поседување опасно оружје, неовластено користење моторно возило и примање украден имот.
Министерството за внатрешна безбедност на САД соопшти дека осомничениот влегол во САД преку Тексас во март 2024 година, кога бил приведен од Граничната патрола, но подоцна бил ослободен. Не е познато дали има адвокат.
Трамп беше цел на повеќе обиди за атентат.
Во јули 2024 година, тој беше ранет во пукотница на предизборен митинг во Батлер, Пенсилванија, кога напаѓач од покривот на блиската зграда уби еден учесник и рани уште двајца.
Во април оваа година, вооружен човек проби безбедносен прстен за време на вечерата на дописниците од Белата куќа во хотелот „Вашингтон Хилтон“, на која присуствувале Трамп и првата дама Меланија Трамп. Осомничениот беше уапсен, а еден член на Тајната служба ранет во инцидентот.