Саудиска Арабија и Сирија во среда потпишаа договор за соработка меѓу министерствата за одбрана на двете земји, објави Саудиската новинска агенција (SPA), во време кога јеменските Хути продолжуваат со нападите со ракети и беспилотни летала на саудиска територија.
Договорот беше потпишан за време на посетата на сирискиот претседател Ахмед ал-Шара на Ријад, каде што се сретна со саудискиот престолонаследник Мохамед бин Салман.
Тоа беше нивна втора средба во Саудиска Арабија за помалку од еден месец.
За време на посетата на Ал-Шарa беа потпишани уште неколку договори.
Саудиска Арабија обезбедува финансиска помош за Сирија и одигра важна улога во повторното воспоставување на односите на Дамаск со светските сили по соборувањето на Башар ал-Асад.
Саудискиот фонд за развој во среда потпиша шест договори со сириското Министерство за финансии, кои предвидуваат одобрување на поволни кредити за развој во вредност од повеќе од 403 милиони долари.
Средствата се наменети за поддршка на секторите за развој и услуги во Сирија, објави сириското министерство.
СПА, исто така, објави дека е потпишан меморандум за разбирање за индустриска соработка помеѓу саудиското Министерство за индустрија и минерални ресурси и сириското Министерство за индустрија и внатрешна трговија и заштита на потрошувачите.
Покрај договорот за соработка помеѓу министерствата за одбрана, двете земји потпишаа и меморандуми за разбирање поврзани со земјоделската соработка и заштитата на животната средина.