По продолжениот викенд, граѓаните во Македонија ќе треба да се подготват за уште една промена што традиционално се случува во овој период од годината – преминот кон зимското сметање на времето.
Во ноќта меѓу сабота и недела, на 25 октомври, часовниците ќе се поместат еден час наназад, со што официјално започнува зимското сметање на времето.
Промената ќе се случи во 3 часот по полноќ, кога стрелките на часовникот ќе се вратат на 2 часот.
Тоа значи дека граѓаните ќе добијат еден час повеќе за спиење, но истовремено ќе мора да се приспособат на пократките денови и на пораното стемнување во попладневните часови.
Преминот кон зимското сметање на времето се случува секоја година во последната недела од октомври.
Иако повеќето современи мобилни телефони, компјутери и други електронски уреди автоматски го приспособуваат времето, граѓаните треба да проверат дали часовниците на рачните часовници, автомобилите, кујнските апарати и другите уреди се правилно поставени.
Со почетокот на зимското сметање на времето, утрата ќе бидат посветли, но денот ќе завршува порано. Оваа промена е особено забележлива во попладневните часови, кога сонцето ќе заоѓа порано, што влијае врз секојдневните активности, патувањата од работа и училиштата, како и врз планирањето на слободното време.
Промената на часовникот повторно го отвора и прашањето за оправданоста на сезонското поместување на времето, кое со години е предмет на дискусии во европските земји.
Иако се дебатира за можноста за укинување на практиката, сезонското менување на времето и понатаму се применува во Македонија и во голем број европски држави.
Никола Ивановски