Латвија го забрани увозот на книги, весници и други печатени материјали од Русија и Белорусија, оправдувајќи ја одлуката со заштита на националната безбедност, потиснување на руската пропаганда и понатамошно намалување на економските врски со Москва и Минск.
Забраната, која стапи на сила на 1 септември, опфаќа и голем број други производи, вклучувајќи облека, обувки, играчки, игри и спортска опрема.
Како што пишува Euronews, Латвија со тоа стана првата европска земја што воведе толку широка национална забрана за увоз на руски производи за широка потрошувачка.
Мерката важи и за стоки со потекло од Русија и Белорусија кои се увезуваат во Латвија преку трети земји.
Латвиското Министерство за надворешни работи наведува дека целта на мерката е да се заштитат безбедносните интереси на земјата, да се намалат приходите што Русија и Белорусија ги остваруваат од извозот и да се ограничи влезот на руски пропагандни материјали во Латвија.
„Забраната за увоз има за цел да ги заштити безбедносните интереси на Латвија и понатамошно да ги намали економските врски со Русија и Белорусија, кои продолжуваат да водат или да ја поддржуваат агресивната војна против Украина“, објави министерството.
Владата, исто така, ја објаснува одлуката со потребата од зајакнување на отпорноста на општеството и намалување на ранливоста на информацискиот простор.
Според Министерството за надворешни работи, книгите, весниците и другите печатени материјали останале меѓу најголемите категории на стоки за широка потрошувачка што сè уште се увезуваат од Русија.
Вкупниот увоз од Русија и Белорусија се намалил за околу 91 процент од почетокот на руската инвазија на Украина, според латвиското министерство.
Латвија, членка на Европската Унија и НАТО што се граничи и со Русија и со Белорусија, силно ја поддржува Украина од почетокот на руската инвазија.
Во исто време, Рига предупредува дека е изложена на различни форми на руска хибридна активност, вклучувајќи сајбер напади и кампањи за дезинформации.
Одлуката за забрана на увозот е дел од поширока политика на постепено прекинување на преостанатите економски врски со Русија.
Уште во јули, Парламентот во Латвија одобри измени во законот што го отвори патот за забрана на голем број руски и белоруски производи кои претходно не беа опфатени со санкциите на Европската Унија или други трговски ограничувања.
Властите веќе презедоа други мерки за ограничување на руското влијание во јавниот и информацискиот простор.
Тоа е чувствително прашање во земја со рускојазична заедница.
Имено, според официјалните податоци објавени од „Еуроњуз“, приближно една четвртина од населението се изјаснува како етнички Руси.