Иранскиот министер за надворешни работи, Абас Аракчи, денес изјави дека американскиот „економски ден Д“ против Иран е обид да се одвлече вниманието од економските проблеми во САД и предупреди дека понатамошниот притисок врз Иран нема да успее.
Претседателот на Соединетите Американски Држави, Доналд Трамп, најави воведување на, како што изјави, „најразорната економска операција некогаш преземена против која било земја“, со предупредување до земјите што обезбедуваат финансиска или друга помош на Иран дека самите ќе се соочат со „огромни економски последици“.
„Никој не ѝ даде на Исламската Република Иран поголема можност да склучи договор отколку јас. За жал за нив, тие не успеаја да ја искористат. Затоа, денес ја објавувам најразорната економска операција некогаш преземена против која било земја. Ова ќе биде економска војна и изолација од невидени размери.
Нивната морнарица е исчезната, нивните воздухопловни сили се уништени, нивните воени фабрики сега се во урнатини, нивната валута е безвредна, а нивната земја виси на конец“, напиша Трамп на Truth Social.