Пожарите продолжуваат да се шират во Франција денес, пред сè во Жиронда, каде што огнената стихија веќе уништи 42.000 хектари од минатата среда и принуди евакуација на 220.000 луѓе, поради што претседателот на таа земја, Емануел Макрон, свика состанок на кризниот штаб за денес, 27 јули.
84 пожарникари-спасувачи се повредени во пожарите, објави синоќа префектурата Жиронда, пренесува денес BFM.
Пожарите во другите делови од земјата, во Горна Корзика, Вар, Високите Алпи и Ланд, сè уште не се изгаснати.
Министерството за внатрешни работи синоќа објави дека пожарите изгореле 115.000 хектари во Франција од почетокот на сезоната.
Макрон свика меѓуминистерски кризен штаб
Денес, Макрон ќе претседава со состанок на меѓуминистерскиот кризен штаб за координирање на борбата против шумските пожари што со денови беснеат во некои делови од Франција, особено во департманот Жиронда на југозападот од земјата, објави Елисејската палата.
Пожарот што зафати 42.000 хектари во Жиронда и доведе до евакуација на 220.000 луѓе, во текот на изминатата ноќ беше оценет како „претежно стабилен“, објави префектурата утрово, пренесува „Фигаро“.
„Ситуацијата беше претежно стабилна во текот на ноќта, без значителни промени. Безбедносните сили и службите за итни случаи остануваат целосно мобилизирани и продолжуваат со своите активности на терен“, се наведува во соопштението на префектурата.
Префектот Софи Брока објави дека летните кампови и извидничките кампови во департманот Жиронда, како и организираните патувања за лица со попреченост, се суспендираат, и апелираше до туристите да не доаѓаат и да размислат за друга дестинација.
Масовни евакуации и голема материјална штета
„Од недела попладне, повредени се уште девет пожарникари, со што вкупниот број на повредени пожарникари се искачи на 84 од почетокот на кризата. Нема жртви меѓу цивилното население“, изјави префектурата, додавајќи дека 240 куќи се уништени во пожарот во Жиронда.
Од избувнувањето на пожарот, речиси 220.000 луѓе од 23 општини се евакуирани како мерка на претпазливост, со поддршка на внатрешните безбедносни сили, што е една од најголемите евакуации спроведени досега во Франција поради шумски пожари.
Префектот Софи Брока им се заблагодари на сите локални службеници кои се мобилизираа со активирање на општинските планови за вонредни ситуации и само синоќа овозможија евакуација на 55.000 луѓе во 12 прифатни центри што беа отворени во девет општини.
Пожарникарите и војската продолжуваат да се борат со пожарот
Францускиот министер за внатрешни работи Лоран Нуњез предупреди дека ќе биде потребно долго време за да се изгасне овој пожар и додека пожарот не се стави под контрола, евакуираните жители нема да можат да се вратат во своите домови.
Во интервју за весникот „Трибин“, Нуњез изјави дека 18 противпожарни авиони се вклучени во гаснењето на пожарот и потврди дека авионот А400М, воен транспортен авион прилагоден за гаснење пожари, повторно ќе биде употребен.
Нуњез повторно ги повика граѓаните да бидат „исклучително претпазливи“, предупредувајќи дека во многу неповолни временски услови, дури и најмалото невнимание може да има драматични последици.
Департманот Жиронд вчера беше ставен на црвено-црно ниво на предупредување за шумски пожари, највисоко ниво на опасност.
Градоначалникот на Бордо, Томас Казнев, го опиша пожарот во Жиронд како елемент „на портата на метрополитенската област“, помеѓу 25 и 30 километри од самиот град, иако евакуацијата на граѓаните на Бордо не е планирана.
Ветровните услови што го отежнаа гаснењето на пожарот се проследени со уште еден топлотен бран.