Членовите на Советот за безбедност на ОН треба веднаш да ја разгледаат резолуцијата за прекин на огнот во Украина, изјави заменик-постојаниот претставник на Украина во ОН, Володимир Павличенко, за време на синоќешната седница на Советот за безбедност.
„Паразилизацијата на Советот за безбедност на ОН во врска со руските злосторства мора да биде прекината од меѓународната заедница, која продолжува да го почитува меѓународниот поредок заснован на правила. Затоа, уште еднаш ги повикуваме членовите на Советот за безбедност веднаш да достават нацрт-резолуција за итно и безусловно примирје“, рече украинскиот дипломат, пренесува Укринформ.
Павличенко, исто така, ги повика партнерите да продолжат со воената поддршка за Украина.
„Не станува збор за ескалација, туку за единствена ефикасна стратегија за враќање на мирот и спасување животи“, изјави заменик-постојаниот претставник на Украина во ОН.
Пред тоа, помошничката генерална секретарка на Обединетите нации за политички прашања, Розмари Ди Карло, објави пред Советот за безбедност на ОН дека најмалку 265 цивили се убиени, а 1.816 се повредени во руските напади врз Украина во текот на јуни.
Ди Карло изјави дека бројот на загинати и повредени цивили во Украина во мај бил највисок од април 2022 година, но дека податоците од Канцеларијата на Високиот комесар на ОН за човекови права (OHCHR) покажуваат дека бројот на жртви во јуни бил уште поголем, а можно е тоа да биде и во јули.
„Овој загрижувачки тренд очигледно продолжува и во јули“, рече Ди Карло, наведувајќи три големи бранови руски воздушни напади врз Киев и други украински градови само во претходната недела, од кои многу биле насочени кон урбани области со големо цивилно население.
Таа рече дека сите напади врз цивили и цивилна инфраструктура, каде и да се случуваат, се јасно кршење на меѓународното хуманитарно право и мора веднаш да престанат.
Според податоците на OHCHR, од почетокот на војната во Украина, најмалку 16.402 цивили се потврдени како мртви, вклучувајќи 802 деца, додека 48.428 лица се ранети, вклучувајќи 2.948 деца.
Ди Карло додаде дека и цивилите што живеат на украински територии под руска контрола, како и на руска територија, исто така се убиваат.
Руските власти објавија дека во првите шест месеци од 2026 година, во Русија се убиени 250 цивили, а 1.596 се повредени, но ОН не е во можност да ги потврди овие бројки, рече таа.
Синоќа, Советот за безбедност на ОН свика итна седница на барање на Украина во врска со најновите напади на Руската Федерација врз Киев и други украински градови, пренесува Танјуг.