Итната потреба на Украина за посилна воздушна одбрана ќе биде тема на дискусија на самитот на НАТО оваа недела во Турција, изјави денес претседателката на Европската комисија, Урсула фон дер Лајен, реагирајќи на најновите напади на Русија врз Украина.
„Синоќа, руските сили неодговорно повторно нападнаа цивили од воздух, со повеќе од 400 беспилотни летала и ракети што го нападнаа главниот град. На Украина итно ѝ е потребна дополнителна воздушна одбрана. Ќе разговараме за ова оваа недела во Анкара на Самитот на НАТО“, напиша таа на мрежата X.
Таа додаде дека ќе се врши сè поголем притисок врз Русија „додека не заврши крвопролевањето“.
Најмалку 14 лица беа убиени, а речиси 60 беа повредени, вклучувајќи пет деца, во рускиот напад врз Киев и регионот во текот на ноќта, објави украинскиот министер за внатрешни работи Игор Клименко, според Танјуг.
Самитот на НАТО ќе се одржи на 7 и 8 јули во Анкара, каде што ќе присуствуваат лидери од 32 сојузнички земји, како претставници на партнерите на НАТО.