Во институциите на Европската Унија, сè повеќе луѓе се залагаат за можноста за распуштање на Европската служба за надворешни работи (EEAS), која моментално ја раководи Каја Калас, пишува Политико, повикувајќи се на извори од европските дипломатски кругови.
Според овој медиум, незадоволството од работата на дипломатската служба расте во рамките на Европската комисија и Советот на ЕУ, а дури десет сегашни и поранешни функционери и дипломати предупредија на, како што е наведено, длабока криза во нејзиното функционирање.
Тие истакнуваат дека EEAS нема јасно дефинирана мисија и дека не може да се натпреварува со Европската комисија ниту во однос на финансиската сила ниту во однос на политичкото влијание.
„И во Советот (кој претставува 27 земји-членки) и во Европската комисија постои група која би сакала да ја распушти Европската служба за надворешни работи“, наведува еден европски функционер, цитиран од Политико.
Сепак, како што се додава, има и такви кои го бранат опстанокот на оваа институција, но нивните аргументи, според истите извори, стануваат сè послаби.
„Политико“ исто така пишува дека шефицата на европската дипломатија, Каја Калас, се повеќе се соочува со критики од европските дипломати, додека внатрешното соперништво меѓу неа и претседателката на Европската комисија, Урсула фон дер Лајен, се интензивира.
Шпанскиот „Ел Паис“ претходно објави дека критиките кон Калас и фон дер Лајен се интензивираат во рамките на ЕУ, а некои дипломати дури го опишуваат нивниот однос како „Игра на тронови“.
Порталот „Еуроњуз“ исто така наведе дека фон дер Лајен би можела да стои зад иницијативите за реформа на дипломатскиот апарат на ЕУ и евентуалното ограничување на надлежноста, што дополнително укажува на растечките тензии меѓу институциите во Брисел.
Според аналитичарите, овој конфликт на надлежност и влијание дополнително го поставува прашањето за идната улога на европската надворешна политика и единството во рамките на институциите на ЕУ.