Севернокорејски војник е уапсен во Јужна Кореја откако ја преминал утврдената граница меѓу двете земји, соопшти денеска Здружениот генералштаб во Сеул.
„Војската обезбеди еден севернокорејски војник во централниот дел на меѓукорејската граница во вторникот вечерта и релевантните власти започнаа истрага“, се вели во соопштението на Здружениот Генералштаб, пренесува Јонхап.
Според воени извори, севернокорејскиот војник наводно изразил желба да пребегне во Јужна Кореја.
Воената демаркациона линија ја претставува де факто границата меѓу двете Кореи и е воспоставена со Договорот за примирје од 1953 година, со кој завршија непријателствата во Корејската војна.
Линијата минува низ демилитаризираната зона, околу 50 километри од Сеул и приближно 150 километри од Пјонгјанг.
Ова е четврти познат случај на севернокорејски државјанин кој пребегнал на југ откако јужнокорејскиот претседател Ли Јае-мјунг ја презеде функцијата во јуни 2025 година, а втор е вмешан припадник на севернокорејската војска.
Во октомври минатата година, друг севернокорејски војник ја преминал демаркационата линија во централниот дел на границата и побарал заштита во Јужна Кореја, по што бил предаден на властите.
Јужнокорејската војска и разузнавачките служби во моментов утврдуваат на која единица припаѓал војникот, колкав е неговиот чин, како и мотивите за преминување на границата, пренесува Танјуг.