Меѓународната агенција за атомска енергија (МААЕ) денес објави дека е информирана дека, по 19-ти пат од почетокот на воениот конфликт, нуклеарната централа Запорожје останала без целосно надворешно напојување.
„МААЕ е информирана дека, по 19-ти пат од почетокот на воениот конфликт, нуклеарната централа Запорожје останала без целосно надворешно напојување по нападот врз електрична трафостаница од другата страна на реката Днепар“, објави Агенцијата на социјалната мрежа X.
Како што е наведено, најновото губење на резервниот далновод од 330 kV Феросплавна-1 доаѓа во време кога централата подготвува поправки на главниот далновод од 750 kV Днипровска, затворен од 24 март, како дел од шестото локализирано примирје договорено од двете страни за да се помогне во обновувањето на втората надворешна енергетска врска.
„Работата со само еден преостанат далновод ја прави централата исклучително ранлива на прекини на мрежата поврзани со конфликтот, што повторно ги доживуваме денес“, се додава во соопштението.
Според МААЕ, нуклеарната централа Запорожје моментално се потпира на дизел генератори за ладење на своите шест затворени реактори и за одржување на други основни функции за нуклеарна безбедност.
Генералниот директор на МААЕ, Рафаел Гроси, изјави дека најновиот прекин на електричната енергија надвор од локацијата уште еднаш ја истакнува екстремната кршливост на електричната мрежа и тековните опасности за нуклеарната безбедност за време на војна.
Нуклеарната централа Запорожје се наоѓа на левиот брег на реката Днепар во близина на градот Енергодар и од октомври 2022 година е под руска контрола.
Производството во енергетските единици беше прекинато во септември 2022 година, а од април 2024 година, сите единици во електраната се во режим на ладно исклучување, пренесува Танјуг.