Повеќе од 300 мигранти кои се упатиле кон Велика Британија минатото лето биле киднапирани, мачени и им се заканувале со присилно земање органи, дознава Би-Би-Си.
Минатото лето, групи мигранти од ирачки Курдистан летале за Либија, каде што биле однесени во комплекс, а подоцна затворени, по наводен спор околу плаќањето помеѓу либанската милиција и ирачкиот шверцер Ноа Арон.
Според информациите, милицијата барала 5.000 долари за секој заложник, додека семејствата биле предупредени дека „исплатата ќе се изврши со бубрег“ ако парите не бидат платени за кратко време.
Во јануари, 110 заложници биле вратени дома со авион организиран од ирачката влада, и не е познато колкумина сè уште се во притвор.
Поранешни затвореници изјавиле дека биле држени „во тесни простории, со околу 180 луѓе кои делеле ќелија“, и дека е познато дека најмалку еден заложник починал.
Таткото на еден од заложниците изјави за Би-Би-Си дека групата на Арон им наплатила на неговото семејство илјадници долари за да организира патување во Велика Британија, кое вклучувало патување низ Северна Африка и преку Медитеранот до Европа.
Тој, исто така, покажа фотографија од својот син на која се гледа лузна за која се стравува дека е од присилно отстранување на органи.
Поранешните затвореници, исто така, споделија вознемирувачки и насилни видеа, од кои едно прикажува млад човек како му кажуваат дека го носат на лекар за да му го отстранат бубрегот.
„Не видовме сонце шест месеци. Беше толку тесно што сите мораа да спијат седејќи. Сите затвореници делеа еден тоалет, а кој ќе останеше предолго ќе беше тепан“, рече момчето (16).
На заложниците им се даваше парче леб дневно само ако нивните семејства им плаќаа на киднаперите дополнителни суми пари, објави Би-Би-Си.
Висок функционер на Министерството за внатрешни работи на Регионалната влада на Курдистан, Хемин Мерани, изјави дека и покрај ризиците, протокот на нелегални мигранти од ирачки Курдистан кон Европа не запрел, повикувајќи ги заложниците да ги споделат своите искуства со своите роднини за да ги одвратат од истото патување.
Ноа Арон сега отслужува 10-годишна затворска казна во Франција за други кривични дела поврзани со перење пари и шверц.
Детали за овие киднапирања се појавија за време на истрагата на Би-Би-Си за Кард Џафа, за кој се верува дека работел со Арон во минатото.
Џаф и Аран се од истиот град Ранџа во Курдистан, регион познат по своите „активни мрежи за шверц“, според извештајот на Чатам Хаус.
Киднапирањата за откуп се широко документирани по миграциските патишта низ Либија, каде што криминалните групи користат ограничена државна контрола во одредени области, што ги прави истрагите особено тешки, јавува Танјуг.