Шеснаесет ученички загинаа во пожар во интернат во централна Кенија, изјави денес претставник на полицијата за новинарите, додавајќи дека уште 74 повредени ученички се однесени во болници.
Пожарот избувнал рано утрово додека ученичките спиеле во женското училиште Утумиши во Гилгил, кое се наоѓа на околу 120 километри западно од кенискиот главен град, Најроби.
Полицијата соопшти дека операциите за пребарување и спасување се во тек, а властите сè уште не ја утврдиле причината за пожарот, јавува Би-Би-Си.
Кенискиот Црвен крст соопшти дека персоналот за итни случаи е на местото на пожарот и пружа помош.
Според полицијата, пожарот избувнал околу 01:00 часот по локално време во четврток (полноќ во среда по средноевропско време) и го зафатил блокот на интернатот каде што се сместени околу 220 ученички.
Како што е наведено, некои од ученичките избегале во околното подрачје за време на хаосот и сè уште се бараат.
„Додека зборуваме, полицијата ја пребарува областа бидејќи некои ученици избегаа во шок и страв во текот на ноќта“, рече началникот на полицијата Масуд Мвињи.