Австралискиот министер за здравство Марк Батлер денес изјави дека карантинот за патниците кои беа вратени во таа земја од луксузниот крузер „Хондиус“ под холандско знаме, на кој се појави епидемијата на хантавирус, ќе биде продолжен на вкупно 42 дена.
„Патниците се информирани за советите и одлуката на владата. Со задоволство можам да кажам дека тие сè уште се добро“, рече Батлер, според Ројтерс.
Батлер рече дека карантинот за патниците на крузерот ќе биде продолжен до 23 јуни.
Од 15 мај, четири австралиски државјани, еден постојан жител на таа земја и еден жител на Нов Зеланд се ставени во карантин во објект во близина на Перт во Западна Австралија.
Првично требаше да останат во објектот до 5 јуни, но карантинот беше продолжен по совет на властите.
Епидемија на хантавирус беше идентификувана на холандскиот крузер „Хондиус“ во април, а досега се потврдени 13 случаи на инфекција кои беа директно поврзани со епидемијата.
Досега се идентификувани три смртни случаи поради хантавирус меѓу патниците на тој крузер, а до 11 мај сите патници се истоварија и беа евакуирани од бродот, многумина во нивните матични земји за карантин.
Генералниот директор на Светската здравствена организација (СЗО), Тедрос Аданом Гебрејесус, претходно изјави дека нема нови смртни случаи од 2 мај, пренесува Танјуг.