Американскиот претседател Доналд Трамп ќе учествува на самитот на Г7 во Франција, кој ќе се одржи од 15 до 17 јуни, објавуваат денес светските медиуми, повикувајќи се на изјавата на функционер од Белата куќа, пренесува Танјуг.
Лидери на групата седум најразвиени економии, која ја сочинуваат Германија, Канада, Соединетите Американски Држави, Франција, Италија, Јапонија и Велика Британија, ќе се сретнат во градот Евиан, во подножјето на Алпите, според BFM TV.
Се очекува атмосферата на самитот да биде напната меѓу републиканскиот милијардер и некои шефови на држави и влади чие присуство се очекува во Франција, а војната во Иран е извор на дополнителни тензии меѓу Трамп и другите лидери на Г7, кои американскиот претседател ги критикува за тоа што не ја поддржуваат американската воена офанзива, или за тоа што не учествуваат во повторното отворање на Ормутскиот теснец, додава француската телевизија.
Меѓу другите теми, Трамп сака да разговара на самитот за поврзување на американската помош со трговијата, промовирање на усвојувањето на алатки за вештачка интелигенција развиени во САД и намалување на контролата на Кина врз синџирите на снабдување со критични минерали, според „Аксиос“.